بقلم : غادة الشرقاوى

……..ونكمل كلامنا مع فن من فنون الحياه  ونخليه اسلوب حياه .

أوعي تكون منافق وبوشين مهما كان الثمن خليك واضح وقول الحق لو علي رقبتك …ساعتها هتكبر في عيون اللي حواليك وهتكبر اكتر فى عين نفسك .حد كده جامد محدش كاسر عينه ولا فارق معاه .

……..فالتقل خيرا أو لتصمت اختار كلامك قبل ما تقولوا حتي لأعز الناس عليك مش معني أنك ضامن حبهم ليك ووجودهم ف حياتك تغلط وتعدي حدودك وتعك الدنيا ولسانك مش سايب حد ف حالو وتقول مكانش قصدي …..أصل اللي في  قلبي ع لساني .لا معلش في خط رفيع جدا بين الصراحه والوقاحه اوعي تعديه فركز ف الكلام عشان اللي ضامن وجودهم في حياتك سهل جدا يمشوا ويسبوك وساعتها ابقي قابلني لوحد فكر يقولك صباح الخير .

خليك انسان كريم وطبعا الكل هيفهم كريم دي في المعاملات الماديه ونجيب منين وأحنا يادوب اللي معانا مكفينا .لا والله مش ده قصدي ….ع فكره الكرم كرم اخلاق حد كده طيب الخلق وبسيط ومش متكلف وفي كريم المشاعر حد عنده عطاء .يعني بلاش تستخسر الكلمه الحلوه في الناس وتجبر بخاطرهم خلي كلامك حلو وكله شياكه وزوق …..دي الناس الحلوه في حياتنا رزق وسبحان الله جعل الابتسامه في وجه اخيك صدقه ..اتصدق ونبي وافردها وخليك بشوش ومتنساش التكشيره بتكرمش الوش وبتعجز كمان .اه والله .

إياك وسوء الظن تخيل انه بيجيب المرض لصاحبه حد كده عايش مفيش امان بينه وبين أي حد طول الوقت شاكك في اللي حواليه ومش مرتاح ليهم …ياسيدي عندك عقل فكر بيه شويه واعقلها وتوكل ..وحرص ولا تخون وأعمل اللي مقتنع بيه بس وعلي أد امكانياتك فبلاش تعمل المفتش كرومبو اللي صعب حد يضحك عليه صدقني هتقع وهيتعمل عليك افلام عربي للصبح وأسالك اللي قبلك  .وخلي بأه سوء الظن بالناس ينفعك

…..الخلاصه احنا بشر وكل يوم بيعدي علينا نحمد ربنا انه عدي بأمان وسلام واخر اليوم مفيش علينا ديون لحد لا بالكلمه ولا بالفعل .بسطوا العيشه ع بعض مش متساهله وجع وتعب ونحمل نفسنا فوق طاقتنا .نحاول نكون سند لبعض عشان الحياه تمشي وف الاخر هنكون ذكري حلوه يفتكرها اللي عاش معانا .

اللهم ارزقنا دعاء مستجاب

دمتم بفرحه تغمر قلوبكم